यो पोष्ट एजेन्सीया म्युरल ब्लगमा प्रकाशित भएको थियो। अनुसन्धान तथा लेखन: एलिन काटिया मेलो, एडुआर्डो मिचेलेट्टो, ह्युम्बर्टो दो लागो मुलर, जेस्सीका सूजा, जोआओ पाउलो ब्रिटो, करिना ओलिभिएरा, लुकास ल्यान्डीन, लुकास भेलोसो, मार्टिना सेसी, प्रिसिला गोमिस, प्रिसिला पाचेको, सिड्नी परेरा, तामिरेस ताभारेस, तामिरेस गोमिस र थाइस सान्ताना। सम्पादन तथा व्यवस्थापन: तामिरेस गोमिस। सामग्री साझेदारी सम्झौताअन्तर्गत ग्लोबल भ्वाइसेजमा यो लेख पुनःप्रकाशित गरिएको छ।
भित्तेचित्र संस्कृति ब्राजिली शहरहरूको कुनाकुनामा व्याप्त छ। साओ पाउलो पनि यस मानेमा भिन्न छैन: सडक चित्रकारहरूले यहाँको खरानी रंगको परिदृश्यमा रंग र जीवन भरेका छन्। तर भिला माडालेना जस्ता मध्य छिमेकहरू अन्तर्राष्ट्रिय यात्रा पुस्तकहरूमा फिचर गरिएका भए पनि निम्न आय भएका बाहिरका बस्तीहरूका भित्तेचित्रहरू अज्ञात रहेका छन्, झण्डै २ करोड जनसंख्या भएका यी शहरका बासिन्दामाझ पनि।
यसलाई मध्यनजर गर्दै एजेन्सीया म्युरलका रिपोर्टरहरूले आफ्ना छिमेकका सर्वोत्कृष्ट सडक चित्रहरूको संग्रह तयार पारे। ब्राजिलमा यस्ता निम्न आय भएका छिमेकलाई क्वेब्राडास भनिन्छ।
साओ पाउलोको उत्तरमा रहेको माइरिपोरामा हरेक वर्ष भित्तेचित्रकारहरूको ठूलो जमघट हुने गर्दछ। चित्रकार कार्लिन्योस रूट्सले यसको व्यवस्थापन गर्ने गरेका छन्। तलका दुई चित्रहरू सन् २०१५ मा भएका दुई सम्मेलनमा तयार पारिएका थिए। यस शहरको मुख्य सीढी पुनर्निर्माणका बेला यी चित्र बनाइएका थिए।
तलको भित्तेचित्र ग्राजाउको कान्तिन्यो दो चिउ लिनियर पार्कमा अवस्थित छ र यसले ब्राजिली उपनगरहरूको यथार्थ दर्शाउँछ। यहीको छिमेकमा आफ्नो भित्तेचित्रकारिताको पेशा शुरु गरेका कलाकार एनिभोले यो भित्तेचित्र बनाएका हुन्। यस चित्रमा चित्रित युवा अर्का स्थानीय कलाकार काइयो क्याटर्नम हुन्। तलको वाक्य, “जोश जगाऔं… किनकि हामी हामीले चाहेका आकारको सपनाले बनेका छौं,” ग्राजाउका –यापर मानो मनीको हो।
लागो अजुलमा हामी कलाकार माउरो नेरीका पहेला घरहरू देख्छौं। उनी पनि ग्राजाउमा हुर्किएका भित्तेचित्र कलाकारहरूका समूहमा पर्छन्।
पारानाबी मार्गको कुनामा अवस्थित भित्तेचित्रले सुसज्जित एउटा घर। अज्ञात कलाकार।
आन्हान्गुएरा जिल्लाअवस्थित पब्लिक सेकेण्डरी स्कूल जार्डेम ब्रिटानियाको पर्खालमा बनाइएको खुल्ला आर्ट ग्यालरी। आर्ट फेस्टिवल “आर्ट एट होम” (घरमा कला) को छैठौं संस्करणका बेला यी चित्र बनाइएका हुन्।
त्रेमेम्बे छिमेकको उम त्रेयास मार्ग भित्तेचित्रहरूले भरिएको छ।
शहरको उत्तरी भेगस्थित साँस्कृतिक केन्द्रको छेवैमा पेन्ट गरिएको भित्तेचित्र। यसका सिर्जनाकार मोन्स्टर एक्टोप्लाज्माका नामले चिनिन्छन्।
बोआभेन्चुरा कोलेटी मार्गस्थित पब्लिक स्कूल पेड्रो मोराइस भिक्टरको पर्खालहरूमा स्थानीय कलाकार ब्राउन, मार्सिया, कबेलो तथा अन्यले भित्तेचित्र कोरेका छन्।
जार्डेम ब्रासिलमा बस्ने कलाकार काटिया सुज्वेलाई मामाघरका हजुरबुवा हजुरआमाले हुर्काए। उनीहरू आफैं जापानी आप्रवासीका सन्तान थिए। उनका कला पूर्वीय विषयवस्तुका लागि चिनिन्छन्। यी कलाकारका बारे थप जानकारी पुर्तगालीमा यहाँ उपलब्ध छ।
क्यारण्डरु छिमेकअवस्थित यो शहरी चित्रकला सिप्रोसले जुभेन्च्युड पार्कमा बनाएका थिए।
जसाना अभेन्यूअवस्थित यो भित्तेचित्र कलुजका नामले चिनिने क्यारोलिना लुजले बनाएका हुन्। उनका कलाहरू प्राय गरेर नारी विषयवस्तुमा आधारित हुन्छ। उनको सौन्दर्यपरक पहिचान उपनगरका महिला र तिनका दैनिकीले प्रभावित छ।
जसाना छिमेकमै अवस्थित तलका दुई भित्तेचित्रहरू कलाकार कास्का (जुरन्डिर रामोस) द्वारा हस्ताक्षरित छन्। उनी छिमेकी जिल्ला जोभा रुरलभरि छरिएर रहेका उनका गाईका चित्रहरूका लागि चिनिन्छन्।
आर्ट एट होम फेस्टिवलबाट लिइएको भित्तेचित्र। साओ पाउलोको पश्चिमी भेग मोहो दोसीमा रहेको देब्रेपट्टिको भित्तेचित्र कलाकार मलाका (ओ.सि.ए.) ले बनाएका हुन्।
स्थानीय कलाकारहरूको बैठक अटाक ग्यादरिङ्गका बेला ग्रेटर साओ पाउलोअन्तर्गत ग्वारुल्योस शहरको छिमेकमा पर्ने जार्डेम कुम्बिकाअवस्थित मानाकापुरु पथ भित्तेचित्रले भरिएको थियो।
तल ग्वारुल्योस शहरको अर्को भित्तेचित्र छ, यसपालि जार्डेम फ्लोर दा मोन्टाना छिमेकअवस्थित बार्तोलोम्यू दे कार्लोस अभेन्यूको एक स्कूलको पर्खालमा। यसको पछाडि बच्चाहरूले बनाएका चित्रकला छन्।
साओ पाउलोको ठीक बाहिर इताक्वाकेसेतुबा शहरको रान्चो ग्रान्दे जिल्लाको मारिङ्गा मार्गअवस्थित यो चित्र जे आल्भेसले बनाएका हुन्।
साओ पाउलोको ठीक बाहिर मोजि दास क्रुजिसको आन्टोनियो बोभोलेन्ता टाउनहाउसको भित्तामा भित्तेचित्र समुदायका लागि एउटा सन्देश छ: “प्राय सधैं, सिर्जनशील समर्पित अल्पसंख्यकले विश्वलाई झन राम्रो बनाएका छन्,” अमेरिकी नागरिक अधिकार अधिकारकर्मी मार्टिन लूथर किङ्ग, जुनियरलाई श्रेय दिइएको उद्धरण।
तलको उल्लू शहरी बासिन्दा जोन नाजाले पेन्ट गरेका हुन्। ग्रेटर साओ पाउलोको पोआमा रहेको काल्मोन भियाना छिमेकको अरेलियो फुगा चोकमा यो भित्तेचित्र देख्न सकिन्छ।
तलका चित्रकला तोद्योने नाम गरेका कलाकारका हुन्। यसका नयाँ रंगहरूले गर्दा ग्वायानाजिसको ट्रेन स्टेशनको फूटब्रीजबाट ओहोर दोहोर गर्ने बासिन्दाहरूको संख्यामा वृद्धि भएको छ। यहाँ ग्याल्भानी गालोका कृतिहरू पनि छन्।
र ग्वायानाजिसको सबवे स्टेशनमा तोद्योनेले सबवेका झ्यालवरिपरि रेलका डब्बा बनाएका छन्।