फिल्म “बेयिश एनेनिन तमनिंदा” (आमाको खुट्टामुनि स्वर्ग छ) को पोस्टर। एर्लन एंडाशेवको यूट्यूब च्यानलमा भिडियो “Эрлан Андашев – Апа (“OST БЕЙИШ-ЭНЕНИН ТАМАНЫНДА”)” बाट लिइएको स्क्रिनसट। न्यायसंगत प्रयोग।

मार्च १ मा, किर्गिस्तानका सिनेमा घरहरूमा “बेयिश एनेनिन तमनिंदा” (आमाको खुट्टामुनि स्वर्ग छ) भन्ने नयाँ किर्गिज चलचित्रको प्रिमियर भयो। फिल्मले ३५ वर्षीय आदिल र उसको ७५ वर्षीया आमा रायखानको कहानी बताउँछ, जसमा आदिलको बौद्धिक विकास ८ वर्षको बच्चाको स्तरमा रोकिएको हुन्छ। दर्शकहरू आदिलको यात्रामा सामेल हुन्छन्। उसले आफ्नो आमालाई धार्मिक स्थल मक्कामा हज गर्न किर्गिस्तानबाट साउदी अरबसम्म ठेलागाड़ीमा लैजान्छ।

यस्तो छ युट्युबमा यस चलचित्रको ट्रेलर।

आदिललाई उसको आमाले हुर्काउँछिन्। उसलाई ऊ भगवानको मनपर्ने मानिसहरु मध्ये एक हो र स्वर्गमा जानेछ भनेर उपहासबाट बचाउने प्रयास गर्छिन्। आफ्नो एक साथीबाट जसका छोराहरूले उनीहरूका आमाहरूलाई हजको लागि मक्का लैजान्छन्, ती  आमाहरूहरू स्वर्ग जान सक्छन्, भन्ने कुरा थाहा पाएपछि आदिलले पनि त्यस्तै गर्ने निर्णय गर्छ ताकि यो सुनिश्चित् होस् कि उसको आमा पनि स्वर्गमा पुग्न सकुन् र आमा छोरा दुवै सँगै बस्न सकुन् ।

उनीहरूको लामो र खतरनाक पैदल यात्रामा उनीहरू धेरै देशहरू पार गर्छन् र असल मन भएका अपरिचितहरूको सहयोगले उनीहरूलाई धेरै चुनौतीहरूसँग लड्न मद्दत गर्दछ। फिल्म सुखद क्षणहरूले भरिएको छ जब अपरिचित व्यक्तिहरू नि:स्वार्थ रूपमा आदिल र उसको आमालाई सहयोग गर्छन्। चलचित्रका निर्देशक रुस्लान अकुनका अनुसार चलचित्रको मुख्य लक्ष्य भनेको मानिसहरूलाई एकअर्काप्रति दयालु बन्न र असल काम गर्न प्रेरित गर्नु हो।

यहाँ चलचित्र निर्देशक र मुख्य कलाकारहरुसँगको कुराकानीवाला एक यूट्यूब भिडियो देखाइएको छ।

तीर्थयात्राको पैदल मार्गलाई देखाउनको लागि विभिन्न सात देशहरू किर्गिस्तान, उज्बेकिस्तान, काजाकिस्तान, अजरबैजान, टर्की, सिरिया र साउदी अरेबियामा चलचित्र छायांकन गरिएको थियो, जसले यसलाई किर्गिजस्तानको इतिहासमा निर्माणको हिसाबले सबैभन्दा ठूलो फिल्म परियोजना बनाएको छ। मुख्य अभिनेता र सह-स्क्रिन लेखक, एमिल एसेनलिएवका अनुसार, धेरै स्थानहरूमा फिल्मको शूटिंगसँग सम्बन्धित प्रशासनिक र तार्किक अवरोधहरू पार गर्नमा किर्गिस्तानका राष्ट्रपति सदीर जापारोवको योगदान महत्त्वपूर्ण थियो।

जापारोवको फिल्मको लागि समर्थन संयोग मात्र होइन र परम्परागत मूल्यहरूलाई बढावा दिने उनको व्यापक नीतिमा फिट हुन्छ। उदाहरणका लागि सन २०२२ मा, उनले “राष्ट्रिय परम्परामा” निर्णयमा हस्ताक्षर गरे र सरोकारवालाहरूलाई किर्गिज परम्पराहरू प्रचारप्रसार गर्न जनतामाझ आउटरिच कार्य सञ्चालन गर्न आग्रह गरे, जसमा बुढेसकालमा आमाबाबुलाई सम्मान गर्ने र सेवा गर्ने परम्परा पनि समावेश छ, जुन कुरा यस फिल्मले प्रोत्साहन गरेको छ।

किर्गिस्तानका इस्लामिक धर्मगुरुहरूले पनि फिल्मको प्रिमियरमा उपस्थित भएर र पछि यसको प्रशंसा गर्दै समर्थन गरेका छन्। यस फिल्मलाई इस्लामको प्रचारको रूपमा लिन सकिन्छ। किनकि यो इस्लामको स्तम्भहरू मध्येएक, हजको वरिपरि केन्द्रित छ, र यसको नाम पैगम्बर मुहम्मदको भनाइबाट लिइएको छ, जसले भनेका थिए कि आमाको खुट्टामुनि स्वर्ग हुन्छ। निस्सन्देह, यसले सोभियत संघको विघटनपछि सन् १९९१ मा देश स्वतन्त्र भएपछि किर्गिज समाजमा इस्लामले खेलिरहेको बढ्दो ठूलो भूमिकालाई झल्काउँछ। उदाहरणका लागि, यस देशमा मस्जिदहरूको संख्या सन् १९९१ मा ३९ बाट बढेर २०२० मा २,६६९ पुगेको छ।

फिल्मलाई अन्य पाँच भाषाहरूमा अनुवाद गर्ने र कम्तिमा तीन अन्य देशहरूको सिनेमहलहरूमा देखाउने योजनाको साथ, यस देशको आधुनिक इतिहासमा किर्गिज फिल्म उद्योगको अहिले सम्मकै सबैभन्दा ठूलो उपलब्धि हो। यद्यपि यो अभूतपूर्व उचाइबाट टाढा छ जुन यो उद्योग सन् १९६० र १९७० को बीचमा पुगेको थियो र “द किर्गिज़ वंडर” को उपयुक्त उपनाम प्राप्त गरेको थियो।

यहाँ सन् १९६० र १९७० को दशकको बीच किर्गिज फिल्म उद्योगको सफलताको बारे एक यूट्यूब भिडियो प्रस्तुत गरिएको छ।

यस सन्दर्भमा, रुस्लान अकुनको नयाँ फिल्म विगत युगका उत्कृष्ट किर्गिज फिल्महरूकै कदम अनुसार चल्दैछ जुन किर्गिस्तानभन्दा बाहिर लोकप्रिय थिए र जसले बक्स अफिसमा करोडौं डलर कमाए र यहाँसम्म कि ओस्करको लागि समेत मनोनयनमा परेका थिए।